發哥養生三式 拒科技‧愛自然‧錫老婆

■不拍戲的日子，發哥生活非常有規律，保養得宜。
攝影：葉君海

周潤發日前到成都宣傳電影《賭城風雲II》時接受本報訪問，甫進入發哥的總統套房，即獲身高六呎的他微微彎腰伸出「友誼之手」自我介紹：「你好，我係周潤發。」背後打點的發嫂亦夫唱婦隨：「坐吖，慢慢問。」發哥親切待人，受到廣大市民愛戴被封「民間特首」實屬正常，筆者表示希望作一個較輕鬆及生活化的訪問，讓大眾更了解他的日常生活及養生之道時，發哥立即脫掉皮鞋並蹺腳坐於梳化上並謂：「好吖，無聊一啲，做人無無聊聊又一日，我都唔使咁拘謹！」
要把發哥全面起底，不能不提在他背後默默打點一切的女人──發嫂陳薈蓮。發哥笑言：「相敬如賓囉，佢講嘢時我就收聲，佢收聲時我更加要收聲。」說時他壓低了聲線，又偷瞄了於房間另一端的發嫂一眼，再跟筆者打個眼色，彷彿賭神高進在跟刀仔打眼色一樣。

𠱁發嫂磨練演技

問到發哥在發嫂面前是否一個「大細路」？發哥就自比好演技的老人精：「我成日扮白癡囉，咁先好玩，你叻過佢，佢唔高興。我會話『咦，咩嚟㗎？』『咦？係噃！』呢樣嘢已經係超越咗演技，比拎影帝更難㗎，所以我都唔使再拎乜嘢獎證明自己喇，我日日都喺度磨練緊！」他透露要令太太窩心，簡簡單單一件瑣事已足夠：「可以係幫佢搵最好食嘅魚蛋，又或者最辣嘅辣椒，總之等佢最嗒糖嘅小食咪搵畀佢囉！」明年是發哥發嫂結婚三十周年，發哥繼續發揮無聊個性，提議要搵拳頭一樣大的魚蛋送發嫂。
發哥今年將踏入六十歲，但他身形依然甚佳，他透露一切來自規律作息：「我七點就起身，食生果，做啲肌肉訓練，大約四十五分鐘至一個鐘左右，去搵人按鬆肌肉，之後就上山跑。冇定邊個山㗎，隨心所欲睇天氣，一去就三、四個鐘頭，之後就揸車返屋企，五、六點到，七點食飯，十點幾就瞓覺。唔使拍戲就日日都係咁嘅，打風落雨就冇辦法啦。」於不久前成功戒煙的發哥更說滿意現時自己的身形，六十歲對他來說會是個全新開始。

■一代賭神不會鋤大Dee，發哥說時都有點尷尬。劇照

反璞歸真餐蛋麵

發哥閒時喜歡上YouTube或Google等網站東尋西找，務求每天也學懂一些新知識，他謂：「我會上網摷唔識嘅嘢睇，上網好方便太多資訊，我求知慾強，呢排睇人釣魚多，台灣人釣鰻魚同海龍好勁。」好學的發哥坦言近日想學揸飛機：「學揸飛機一要體力，二要視力，三要英文好，可以慢慢學，喺個天度飛應該幾好玩，有時我行山見到人玩滑翔降傘都好玩，我都想試，但係人命攸關。」說到此時，發哥又再壓低聲線及偷瞄了發嫂一眼。
談到市民最常捕獲到發哥的地點是九龍城街市，他大爆自己通常只是負責買餸，發哥說：「通常周太唔畀我煮，覺得我煩，整污糟佢個廚房，所以通常都係佢煮。有時我買佢都話麻煩，咁佢咪買埋煮埋洗埋囉，我就負責食。」發哥自言廚藝不俗，最拿手的竟是「反璞歸真餐蛋麵」，他說：「唔好搞得咁複雜嘅餸都OK嘅，但我煮餐蛋麵最得，十個食十個覺得OK。」發哥又向筆者透露了自己的壞習慣：「我冇乜耐性，所以唔係好鍾意約埋啲多人做嘅嘢，約人要take care好晒，其實我係一個好隨意嘅人，成日都易變化。至於小習慣係太太話我食飯食得快，食完就快快走，因為慣咗喺片場好快食完開工，其實對消化系統唔係咁好。」
發哥在街頭若被成功捕獲，往往會主動拿對方的手機自拍，其中一個原因是覺得對方見到自己會手騰腳震。但「自拍神」發哥原來沒有智能電話：「我出街會熄電話，我唔喜歡被打擾，想專心做嗰樣嘢。我冇智能手機，所以咪用人手機拍，我唔係唔追科技，而係一有智能電話就會俾人逼你入會（群組），有好多我唔想知嘅嘢要逼住知，有時又要表態我又唔想。有啲微博想畀靚戶口我都唔要，有負擔有責任，要回應，都唔知答乜嘢好。」

賭神唔識鋤大Dee

談到有何情況下會婉拒合照要求？發哥坦言除了趕回家食飯外，普遍也歡迎合照，他又笑指香港人常看着手機會錯過了野生捕獲他的機會，發哥說：「一千人有一個人會認得嘅，見過賭神背影咪認得囉。」問到他若然人有三急，會否介意到公廁？他笑言：「冇所謂，我有口罩就冇人認到，出入自如易容高手，喺郊外就更方便，成個大自然係你嘅，施吓肥都仲得。」
發哥賭神形象深入民心，但他自爆連「鋤大Dee」都不會玩，他帶點尷尬表示：「賭神唔識賭？講出嚟實俾人笑，你咪同人講呀，我喺《賭城風雲》時仲問人點鋤大Dee，仲有一個係鬥地主我都唔識，笑死人，真係唔可以話人知，唔係以後冇人睇。」問到發哥若非演員，會做甚麼職業？他表示：「如果係嗰時農村社會，我諗我都仲係鄉下佬耕田，自種自食。呢個都係我嚮往嘅生活之一，我𠵱家都會picture到將來退休回歸大自然係好正常。」看見他說時一臉陶醉，筆者也picture到他的農夫造型了。

■雖然發哥經常在街市現身，但原來發嫂不會讓他入廚房。資料圖片

後記

訪問過後有幸跟發哥夫婦晚飯，飯後行經一條後巷，自言不太懂拍人像的發哥一時興起，二話不說拉了發嫂做模特兒。雖然沒有耀眼巨鑽，但從發嫂眼中散發的喜悅神韻，已勝過千言萬語。